5 NM-gull og 2 noregsrekordar til Ariel

Ariel Braathen, som fyller 17 år i mai, vann alle bryst-distansar under senior-NM kortbane i Stavanger i helga.

På 50 meter fredag blei det gull og ny norsk juniorrekord med 31,27.

På 200 meter laurdag blei det gull og ny personleg bestenotering med 2.27,11.

På 100 meter søndag sikra ho seg full pott, gull i 3 av 3 individuelle øvingar med 1.07,93 i forsøket og 1.08,34 i finalen. Silje Mikkelborg tok 2. plass med 1.08,48, Maria Altmann tok bronse med 1.09,52.

Sjå Ariel si facebookside for video av gull-distansane.

– Betre enn venta

– Dette gjekk langt betre enn venta, spesielt medaljemessig, seier Ariel til Midtsiden.

– Medaljemessig? Er det nokre tider du ikkje er nøgd med?

– Sidan eg svømte min beste 50 meter og beste 200 meter nokosinne skulle eg ønska at eg klarte det same på 100 meter. Her var eg i forsøket eit lite sekund bak pers.

– Eg hadde fokus på å gå for gull trass i at eg var sliten etter 200-meteren. Eg klarte å vinna og er sjølvsagt nøgd, ikkje minst sidan eg framleis er i ein ganske tung treningsperiode.

Tre medaljar og norsk seniorrekord på medley

Ariel reiser heim frå Stavanger med meir enn tre gullmedaljar.

Ho var del av Bergen SC sitt lag på både 4x50m medley, 4x100m medley og 4x50m mix (gutar/jenter) medley.

– På mix blei det bronse, på 50- og 100-meteren blei det gull.På 100-meteren blei det dessutan ny norsk seniorrekord.

Viktig tur til Sverige om tre veke

No blir det eit par rolege treningsdagar på Ariel før litt hardkjør fram til to-tre dagar påskeferie, eit par harde økter til og så ei roleg veke for å toppa formen inn mot Stockholm Open i slutten av mars.

Her blir tidene viktigare enn medaljane, dette er nemleg langbane og eit av komande uttaksstemna til OL.

Ariel har frå før B-krava i boks, men jobbar hardt og målretta for å klara A-krava på 100- og 200-meteren for å sikra seg billett til Rio i august.

Les òg: Ariel si siste ferd mot OL