30 100 osingar i 2040?

Tysdag publiserte Statistisk Sentralbyrå (SSB) korleis dei trur folkeveksten i Noreg vil bli fram mot 2060.

Allereie i 2030 vil Noreg passere 6 millionar innbyggjarar, noko som i så fall vil bli den raskaste millionpasseringa i noregshistoria.

– Då vil Noreg ha gått frå 5 til 6 millionar innbyggjarar på under 20 år, skriv SSB i ei pressemelding.

Noreg passerte 5 millionar innbyggjarar i 2012.

I framskrivingane fortset folketalet å auke fordi talet på innvandringar og fødte framleis vil vera høgare enn talet på utvandringar og daude.

Passerer 30 000 i 2040

SSB har brote ned framskrivingane på kommunenivå. I framskrivingane opererer dei med eit hovudalternativ, men ser òg på korleis tala blir med låg nasjonal vekst (låg fruktbarhet, låg levealder og låg nettoinnvandring) og eit med høg nasjonal vekst

(høg fruktbarheit, høg levealder, høg nettoinnvandring).

For Os kommune syner framskrivingane at vi med hovudalternativet vil vera 30 100 osingar i 2040. Låg vekst gjev 27 700, medan høg vekst gjev 33 100.

I løpet av første kvartal 2016 blei vi 19 833 osingar.

I samband med ei eventuell kommunesamanslåing med Fusa kan det òg vera interessant å sjå på tala frå Fusa. I houvdalternativet trur SSB at det i 2040 vil vera 4 300 busett i Fusa. 4 000 med det låge alternativet og 4 700 med høg vekst.

Fusa var ved utgangen av første kvartal 3 890 innbyggjarar.

Ei ny Bjørnafjorden kommune vil med det gje 34 400 innbyggjarar i 2040 (31 700 låg/37 800 høg).

Det blir fleire eldre

SSB meiner at talet på eldre vil stige betydeleg i åra som kjem. I hovudalternativet er kvar femte person 70 år eller eldre i 2060. Til samanlikning er berre kvar niande person fylt 70 år i dag.

Auka skuldast først og fremst ei forventning om auka levealder også i dei kommande åra. SSB trur at aldringa blir mykje sterkare i distrikta enn i byane.