25 mål på 4 kampar
Sjå bildeserie frå Bjørnefjorden Cup, og av eit av stortalenta vi oppdaga på matta.
Bildeserie:
I helga blei det spelt over 200 kampar på Kuventræ. Gutar og jenter frå 6 til 12 år, dei eldste på 7-ar bane dei yngste på 5-ar bane.
SJÅ FLEIRE BILDE FRÅ BJØRNEFJORDEN CUP 2009
Nye, spennande motstandarar og gamle erkerivalar møttest, og med fire kampar i vente kunne dei unge spelarane senka skuldrene og tenka at dei hadde fleire sjansar til å visa kva dei var gode for.
Oppgåvene er ikkje enkle, verken for kjempande spelarar, trenarar som prøver å rettleia og foreldre som skal prøva å dosera engasjementet sitt til passande mengd og type formulering.
Mål etter mål
På jakt etter nokre innhaldsrike augneblink tok vi ein tur på kamp mellom nokre av dei yngste laga. Og Midtsiden trengte ikkje stå lenge på sidelinja før vi fekk noko å ta bilde av i kampen mellom 7-åringar frå Søfteland og Lysefjorden. På fire minutt gjekk like mange skot i mål, sjølv om keeperen var god.
- I denne aldersklassen skil spelarane seg lettare ut, om dei har ekstra løpskapasitet eller god teknikk, seier Tore Nielsen.
Han er pappa til Mats Torp Nielsen på Søfteland sitt 2002-lag, og assistenttrenar for Os sitt A-lag. Mats har både fart og teknikk, og vi såg han henta ballen på den eine sida, springa rundt både motstandarane og sitt eige lag, over til motsett side og fram for å skåra.
Ikkje berre enkelt
Det enda med 25 mål på 4 kampar på unge Nielsen, men faktisk berre siger i to av kampane.
- Os gav oss motstand. Då var det kjekt at det var konkurranseinstinkt og ikkje frustrasjon som kom. "Vi ville jo vinna" forklarte han til meg etter kampen.
- Men det er ikkje berre enkelt å sjå på ujamne kampar. For mykje jubel kan vera tøft for dei som ligg under med mange mål, samstundes ventar dei som skårar at spelarar og foreldre blir glade.
- Er det ein spelar som skil seg ut i positiv retning, blir det dessutan lagt merke til om denne er på banen nokre minutt lengre enn andre, seier Nielsen.
Han er glad han ikkje er trenar for sonen sitt lag.
- Eg er glad han liker det han held på med, fritida går også mykje med til fotball-leik med klassekameratar og med dei som er eldre. Dette med resultat jamnar seg nok meir ut med åra, i mellomtida er det viktig at han og resten av laget trivst, og at dei saman utviklar seg, seier Tore Nielsen.