23 millionar i pluss
Os kommune gjekk med vel 23 millionar kroner i overskot med ein resultatgrad på 3,66%. Likevel blir det ikkje kommunal kjøpsfest.
Økonomisjef i Os kommune Ingrid Karin Kaalaas er nettopp ferdig med det førebelse resultatrekneskapet for 2012.
- På Stord blei det applaus når dei leverte eit overskot på 12 millionar, fortalde Lars Atle Skorpen (Ap), medan han spent venta på at økonomisjefen skulle presentera tala for Os.
- Dei førebelse tala synar at vi gjer opp rekneskapet med eit overskot på vel 23 millionar, svara Kaalaas, noko som høsta applaus frå formannskapet.
Hovudvekten av overskotet skriv seg frå avkastning på finansportefølja og ein auka skatteinngang.
Ein milliardkommune
Resultatet gjev ein resultatgrad på 3,66%, noko som er vesentleg høgre enn det statlige mynde krev.
- Vi har blitt ein milliardkommune.
- Os kommune har over ein milliard i inntekter, over ein milliard i utgifter og over ein milliard i gjeld.
- Så du kan trygt seie vi har sprengd milliardgrensa, fortalde økonomisjefen.
Tilrår rentefond
Fungerande rådmann Geir Engelsen plukka raskt opp tråden frå økonomisjefen.
- Det er ikkje noko hemlegheit at rådmannen si innstilling i saka vil vera å settja av midlar til eit rentefond.
- Med ei milliardgjeld vil det vera fornuftig å setja av midlar til eventuell framtidig renteauke.
- Vi har enno ikkje balanse i sjølve driften. Om vi aukar driften risikerer vi å må dra den ned att om renta auker, argumenterte Engelsen.
Vanskelege avveiingar
Formannskapsmedlemmane forsto kva Engelsen freista å forklarar dei, men samstundes er alltid lysta til å gjera noko nytt der.
- Det kjem til å gje oss nokre vanskelege avveiingar.
- Vi skal ikkje gløyme at resultatet kjem etter ein kjempeinnsats frå alle i organisasjonen for å ta driften ned på det nivået vi no ligg på.
- Difor er det viktig å hugse at dette i hovudsak er eingongsinntekter når vi kjem til handsaminga av årsmelding og årsrapport i samband med 1. tertial i april, minna ordførar Terje Søviknes (Frp) om.
Etter å ha høyrd formannskapet sin diskusjon rundt KUP-midlar og sett all den aktiviteten som gjeng føre seg i bygda gjennom søknadene på desse midlane kan ikkje Midtsiden fri seg for å spela inn ideen om å laga ei ekstraløvying til dei frivillige laga og organisasjonene i bygda for litt av overskotet.