1500 på kveldskjøring
... og i dag er stolheisen i drift for første gong denne sesongen.
Eikedalen og Voss fekk store snømengder frå søndag til tysdag og Eikedalen, som har det beste kveldskjøringtilbodet av anlegga rundt Bergen, hadde sesongens beste kveld tysdag.
– Vi hadde rundt 1500 i anlegget tysdag kveld. Det er omtrent det same som vi hadde førre laurdag.
– Nokon kjem rett frå jobb, andre kjem litt seinare. Dei som kom i 18.30-tida, og såg at parkeringsplassen nesten var full, blei nok litt overraska, trur dagleg leiar Fredrik Tønjum.
Eikedalen er open 7 dagar i veka. I tillegg er det kveldskjøring 4 dagar i veka, tysdag til fredag frå klokka 16 til 21.
Stolheisen klar for storinnrykk
Fredag var blant andre Os ungsomsskule i anlegget og hadde skidag. God timing, med strålande vêr og ein halv meter med tørr og ganske fersk snø i bakkane.
Dei siste dagane inn mot helga har det dessutan blitt jobba hardt med å få løypene rundt toppen klar.
– No kan vi også opna stolheisen, for første gong denne sesongen. Det kjem nok godt med, for med fine meldingar og mykje snø ventar vi bra med folk i bakkane denne helga, sa Fredrik til Midtsiden fredag kveld.