1. mai: – Ikkje alt blir digitalt

Også årets 1. mai blir annleis, og utan at 115 personar kan samlast i Kløvertun, som plar vera del av markeringa i Os.

– Det må dessverre venta til 2022, seier styreleiar i Bjørnafjorden Arbeiderparti, Øystein Oen.

Hovudmarkeringa blir digital og sendt direkte via sosiale media.

Hovudtalar i år er Marte Mjøs Persen, førstekandidat på Arbeiderpartiet si stortingsliste og ordførar i Bergen.

– Det blir òg talar av ungdom, Benjamin Jakobsen og Åse Sælensminde for internasjonal solidaritet, og ein appell frå hovudtillitsvalt i Bjørnafjorden kommune, Trond Solholm.

– Éin ting som blir likt som før er blomsternedlegging i minneparken.

– Det blir verken appell eller musikk, men vi stiller med fire personar frå Os Ap, saman med ei flaggborg, for å gjennomføra ei stille og verdig markering, fortel Oen.