Vil skapa musikaleventyr på Os

På Gjøvik har ei gruppe eldsjeler i fleire år satt opp framsyninga «Musicals i Gjøvik». Då Maiken Bahus Heimtoft gjekk på musikk, kunst og teater-linja ved Toten Folkehøgskule i forfjor fekk ho lyst og inspirasjon til å gjera det same i heimbygda.

– Sognlæraren eg hadde på Toten var med på musikalane på Gjøvik og blei ei enorm inspirasjonskjelde. I tillegg til å vera med i musikaloppsettinga, arrangerte ho sommarskule og workshops. Det var så gøy å oppleve det samholdet og den gløden dei hadde med ungar frå 8-9 år til godt vaksne i 50-60 åra.

– Tanken har lagt å modna siden eg kom heim frå folkehøgskulen. Tidlegare i juli fekk eg lyst til å gjera noko med det og etterlyste på «Oppslagstavlo i Os» på Facebook om det var andre som hadde lyst til å vera med, fortel Maiken Bahus Heimtoft.

– Lysta er det viktigaste

Allereie har fleire meldt seg og blitt med i den nyoppretta gruppa «Musikaler til øyro» på Facebook.

– Eg har ikkje erfaring nok til å gjera det aleine. Difor gjekk eg ut med etterlysinga på facebook. Om det er nokon som kjenner at dei har ein kordirigent i magen eller som har lyst til å prøva seg som instruktør så er det berre å melde seg inn i gruppa, så kjem vi tilbake med øvingar og liknande etter sommaren.

– Vi treng sjølvsagt òg både songarar og musikarar. Blås i om du ikkje har allverdens erfaring. Eg trur alle kan synga, berre ein tørr prøva. Det viktigaste er at ein verkeleg har lyst til å vera med og at ein ikkje vil gje seg etter berre ein gang. Då skal vi få det til, smiler den initiativrike ungjenta.

Siktar mot framsyning til våren

Maiken Bahus Heimtoft fortel at ho ser for seg å kunne setta opp ei framsyning utpå våren 2016.

– Eg har ikkje lyst til at dette skal bli eit stressprosjekt med øvingar fire fem ganger i veka heile hausten og vinteren. Eg ser for meg at vi møtast ein gang i veka og at reportoaret får utvikla seg litt etter kvart.

– Kva slags framsyning ser du for deg? Er det ein musikal eller smakebitar frå fleire?

– Det er smakebitar frå fleire. Det å skulle setta opp ein musikal trur eg krever for mykje, både i høve rettigheiter og på andre måter. Dessuten er det så mykje nydeleg musikaler at eg trur eg hadde hatt vanskeleg å velgja berre frå ein, ler ho.

– Ja, kva er favoritten då?

– Oi, det var eit vanskeleg spørsmål. Eg liker "dårlege" musikaler like godt som dei store og kjende. Filmen «Legal Blond» finnst òg som musikal, den diggar eg, men favoritten må nok vera «Phantom of the opera». Då eg såg den i London kom tårane, avsluttar Bahus Heimtoft.