Ungjenter gav fiskarane håp
... men «monsteret» beit ikkje på kroken i løpet av opningsnatta i Oselvo.
Bildeserie:
Etter det Midtsiden kjenner til er det førebels ikkje tatt laks i Oselvo etter sesongstart ved midnatt 15. juni.
Har du fått fisk? Kontakt Midtsiden på 90789270 eller kjetil@midtsiden.no.
Snev av håp i sone 2
Alt låg til rette for ein brakstart på sesongen for Stig Gram-Knutsen, som har fiska i Oselvo samanhengande sidan han var liten, og for første gong fått sone 2 på opningsnatta. Med seg hadde han Remi Bårtvedt, barnebarnet til Oskar, som Oskar-prisen er oppkalla etter.
Det einaste som mangla var vassføring.
– No skal eg finlesa reglementet og sjå om det er eit smutthol for å argumentera for at eg må få sone 2 neste år òg, spøkte Stig, ein halvtime ut i årets fiske.
Kameraten Remi hadde i utgangspunktet eit snev av håp om fangst, trass låg elv, etter ein samtale med to unge jenter tysdag ettermiddag.
– Eg var nedom etter jobb for å sjå om det sto noko fisk her, og då var det to unge jenter og bada i kulpen. Plutseleg sat begge seg opp på land. Dei sa dei ikkje våga å bada meir på grunn av eit monster av ein fisk, fortel Remi og viser kor stor jentene sa at fisken var.
– Det kan jo henda at det står ein bra laks her, men det spørs om han bit.
Gjedde og aure
Mens Remi ikkje fekk napp hadde Stig det han kallar ein vaksen laks bortom snøret på første kast.
Men det einaste han tok på land var tre småfiskar, den største var ein brunaure på 0.5 kilo, og alle blei naturlegvis sett ut igjen.
Ifølgje Ole Vidar Søviknes, som følgjer fisket tett gjennom sesongen, har Carl-Otto Curran tatt ei gjedde på 1,5 kilo. Sjå bilde på prohd.no.
– Eit utruleg kick
Stig og Remi gav seg i 2-tida i natt, framleis utan fangst. Men dei ser begge fram til resten av sesongen og spesielt til første skikkelege regnskyll.
– Er det mange netter som går med i løpet av sesongen?
– Nei, det blir stort sett ettermiddag og kveld, og nokre morgonar, at eg reiser på jobb litt seint og står og fiskar frå 8 til 10, fortel Remi.
Han hadde ikkje fiska på mange år då han i 2011 tok opp igjen hobbyen,
– Dei første åra blei det berre tert, laks oppunder 3 kilo. Den første laksen tok eg heilt på tampen av 2014-sesongen, i september. Den største eg har tatt var på 6,6 kilo, det var eit utruleg kick!
Midtsiden samleside: Jakt og fiske