Luftig feiring på Fonna

Arne Veim Haugland, Thomas Bøthun og resten av dei mest akrobatiske ski- og snowboardentusiastane i Os bestemte seg tidleg for å følgja opp suksessen frå i fjor.

Men i år hadde dei ikkje vêrgudane med seg, så då blei det først snakk om flytting til Voss Fjellandsby, så Folgefonna.

– Det blir på Fonna og datoen er bestemt, seier Arne og Thomas.

Gutane vil bruka nasjonaldagen på å konkurrera om luftige svev på brett og ski. Det er dei ikkje åleine om.

Uganda, dansk meister og tittelforsvararar

Sidan datoen nyleg blei kjent har dei ikkje kontroll over kor mange deltakarar det blir, men er det mange nok så blir det delt inn i både alder og kjønn i tillegg til at brett og ski er kvar sin klasse.

– Men det ser ut som om både Mikkel Jørgensen (dansk meister i 2009) og nesten heile Team Uganda kjem. Også dei fleste tittelforsvararane frå Os Snow Challange 2010 er venta å sjå på Fonna 17. mai.

Desse vann i 2010:
Under 16 år, snowboard: Eirik Titlestad
Over 16 år, snowboard: Andreas Ask
Under 16 år, ski: Mathias Meek
Over 16 år, ski: Martin Bolstad

– Vi har fått sponsa fleire flotte premiar, som snowboard, ski, jakke og lue, lokkar arrangørane.

Frå Stadion til Jondal

Arrangørane seier det ikkje er uvanleg med konkurransar på Fonna 17. mai. Sjølv har dei planar om å reisa til Jondal kvelden før.

– For min del blir det rett frå Brann-kamp og inn til Hardanger. Andre reiser sikkert før, for det blir fest på campingen utover kvelden.

Vilt med kilt og luft rundt pilt

Konkrete planar for starten på nasjonaldagen har dei ikkje, anna enn å få i seg litt frukost og koma seg opp på Fonna før starten går klokka 12.

– Det blir nok nasjonaldagstemning uansett. Sjølv kjøpte eg meg kilt for nokre år sidan, som eg gjekk med på 17. mai i fjor, og som eg har planar om å gå med når eg hoppar i år, seier Arne.

Han fryktar ikkje telelinser eller konsekvensane om han skulle ramla med rumpa bar.

– Eg bør no klara å kontrollera inn ein backflip utan at kilten kjem ut av posisjon, trur han, og tar eit testhopp frå moloen på Os.