Kan kjellaren brukast før hallen står ferdig?

Bildeserie:

Full skjerm

1 av 3

Bygginga av ny dobbelthall på Kuventræ går for fullt, og første betongdekke, taket til den komande parkeringskjellaren med 95 parkeringsplassar, er støypt.

Hallen, som har eit fotavtrykk på rundt 53 x 54 meter, blir bygd på, i hovudsak, det som var parkeringsplass for Oshallen og Osbadet.

– Det har gått fint til no, men vi ser at det kan vera vanskeleg å finna parkeringsplass enkelte kveldar, og i helgene når det er mange handballkampar og samtidig mykje gjestar i Osbadet, seier Jon Sivert Rykkel frå Osbadet KF.

– Vi oppmodar folk om å vera tolmodige og varsame, spesielt no når det er vått og mørkt, så vi unngår ulykker. Vi håper òg at dei som bur nær Kuventræ vil setja bilen heime og at andre driv litt samkøyring, eventuelt bruker parkeringsplassen nedanfor Os Asvo i Industrivegen (sjå kart i bildeserien over). Den har god kapasitet kveld og helg.

Opning før opning?

Arbeidet held fram i høgda, og vi reknar med at hallen vil sjå ferdig ut frå utsida fleire månadar før den er klar til overlevering.

– Er det sjanse for at parkeringsplassane i den nye kjellaren kan brukast før opning av hallen?

– Vi har tenkt på det same, men har førebels ikkje vore i dialog med hovudentreprenør (Consto), seier Ole-Håkon Sælen, prosjektleiar for byggherre Os kommune.

Hos Consto har dette førebels ikkje vore tema.

– Vi må i så fall i dialog med byggherre, seier prosjektleiar Christoffer Helland.

– Eg ser at det kan vera ein gevinst om denne opnar tidlegare, men det skal i så fall ein del til. Sjølv om parkeringskjellaren er ferdig asfaltert står det igjen ein del arbeid som ikkje er så synleg for folk. Det er heller ikkje berre til å flytta på nokre gjerder, vi har fleire føringar å gå etter, og kan ikkje sleppa publikum inn i kjellaren utan at alt er i forskriftsmessig stand.

Får utvida plass utandørs

Uavhengig av om det kjem ei tidlegare opning i den nye kjellaren er fasilitetane i ferd med å bli betre.

– Parkeringsplassen ved Oshallen, ved kastefeltet mot Ulvenvatnet og kyrkjegarden, er utvida. Her skal nokre massar flyttast vekk, i tillegg skal det snart koma lys i tre stolpar på plassen, og då blir forholda større og betre, seier Sælen.

– Den nye gangvegen frå parkeringsplassen nedanfor Os Asvo, forbi Kuventræ barneskule, er nyleg grusa, så også her er det betre tilrettelagt.

Koplar nybygg saman med Osbadet

Sælen fortel at arbeidet med ny dobbelthall går etter planen.

– Måndag startar arbeidet med første av tre delar av samankopling på gateplan, der nyehallen skal saman med Osbadet og Oshallen.

– Osbadet skal vera ope i heile perioden, sjølv om fjerning av den store glasveggen ved kafeen er noko av det første arbeidet som skjer.

Innhald

Midtsiden skreiv 1. august at det ikkje såg ut som om det var teikna inn toalett i same etasje som tribunen, men det var det allereie før august.

Teikningane for innreiinga har vore justert fleire gongar, dei ferskaste er frå 20. september, og det er gjort fleire små endringar også etter dette.

Innhaldet i hallen, over parkeringskjellaren er blant anna:

1. etasje
• Stor foajé
• To fullskala handballhallar til fleirebruk
• 6 garderobar (3 herre, 3 dame) med toalett og dusj
• 2 dommargarderobar
• 2 lager (45 og 105 kvm)

2. etasje
• Tribune på 143 kvm
• Toalett
• Teknisk rom 73 kvm
• 4 disponible rom (65, 124, 142 og 222 kvm)