Ikkje ønskja i Oselvo

Midtsiden skreiv i førre veke om at det var tatt to pukkellaks på to dagar i Oselvo. I løpet av dei siste dagane har det blitt fanga fire nye eksemplar av laksetypen som blei satt ut på Kolahalvøya på 50-talet. Alle dei fire siste var fulle av rogn og frå 0,7 til 1,4 kg i følgje ProHD.no som følgjer livet i elva tett.

Ikkje velkomen

Norsk institutt for naturforsking (NINA) har dei ti siste dagane fått rapportar om over 200 pukkellaks tatt i norske vassdrag. Arten er uønska i norske elver, men forskarane veit ikkje heilt kva skader den kan gjera.

– Den er svartelista som høg risiko. Når dei blir mange er det større fare for at det kan få negative konsekvensar på norsk natur, seier forskar, Eva Thorstad i NINA til NRK.

Kamp om gyteplassane

Forskarane er redde det vil bli ein kamp om gyteplassane, siden den gyter på dei same stadene som laks og aure.

– Pukkellaksen gyter på eit tidlegare tidspunkt enn andre laks, så dei er ikkje i konkurranse. Men når bestanden blir veldig stor, kan det bli problematisk, seier Rune Muladal i Naturtenester i Nord. Muladal har jobba med laksearten i om lag 20 år. Han fortel til NRK at ein frå Russland har dømer på at laksen har fått soppdanningar som kan påverke anna fisk når bestanden døyr. Pukkellaksen gyter nemleg berre kvart anna år og døyr rett etterpå.

Varmare i sjøen

Grunnen til auka i pukkellakser som blir teken i år trur forskarane skyldes gode klimatiske forhold i havet dei siste åra.

– Det har vore varmare i sjøen, og fleire har greidd å overleve, meiner Muladal.