Har booka Peppes - 12 månadar fram

Dette året har Bjørnafjorden kommune arbeidd med å laga ein veteranplan.

Planen blei vedtatt i kommunestyret i juni.

I samband med arbeidet har NVIO Bergen og omland engasjert seg, og blant anna hatt fleire av treffa sine i Os.

– NVIO Bergen og omland inkluderer oss i Os og resten av Bjørnafjorden kommune, men vi ønskjer å ha ein fast møteplass her lokalt, seier veteran Morten Rismose.

Han har saman med NVIO reservert Bar(t)-lokalet på Peppes den siste fredagen kva månad fram til september 2024 (!).

– Eg veit ikkje kor mange vi blir i kveld, utover meg og varabrannsjef og veteran Erik Walden, men alle er velkomne, veteranar, sambuarar og andre interesserte.

Veterantreffet skal vera både for dei som vil ha ei sosial stund, utveksla erfaringar eller ha nokon å støtta seg til, om dei har det vanskeleg etter tenesta dei var i.

– Treffa og miljøet i Bergen er veldig bra, men eg trur det er ein styrke med eit tilbod også her lokalt.

– Blir vi ei god gruppe her, kan vi òg laga litt aktivitetar utanom treffa, som fjelltur, temasamling eller ein annan aktivitet.

Forsvarets Veterantreff er ein fast aktivitet som NVIO fasiliterer for Forsvarets Veterantjeneste på landsbasis.