Frå leppefisk til lastebil
Fekk forhandlarstatus for Pro-Flex: Aqua Circle AS startar «hydraulikk-butikk».
Bildeserie:
Aqua Circle AS, som i fjor blei etablert på bakgrunn av ei oppfinning knytt til fôring av reinsefisk, fortalte i mai om fleire nye produkt og nye partnarar.
No har dei i tillegg blitt forhandlar for Pro-Flex AS.
Bergensfirmaet Pro-Flex er totalleverandør av slangar og koplingar til både oppdrett, transport, verftsindustri og offshore, og leverer slangar i ulike materialar, også rustfritt stål.
Selskapet vaks frå 59 til 76 millionar i omsetnad frå 2013 til 2014.
Frå kunde til forhandlar
– Vi har vore kunde hos Pro-Flex sidan start, fôringsslangane vi bruker er spesialprodusert til oss, fortel gründar Jonny Møgster.
Møgster har sagt seg opp som driftsleiar i Lerøy og jobbar fulltid for Aqua Circle.
– Vi har allereie brukt 10 km slangar i fôringsanlegga våre og har kjøpt yttarlegare 9 km.
– Då dei spurde om vi ville bli forhandlar for oppdrettssortimentet så sa eg at vi i så fall ville ha fullsortiment, og det fekk vi.
Frå gravemaskin til båt
Aqua Circle har no bygd om og utvida verkstaden med eigen slange- og hydraulikkavdeling.
– Vi har òg eit lite lager, men alt kan uansett skaffast i løpet av eit par timar.
– Her har vi slangar til kva som helst, frå maritim sektor til landbasert industri. Vi har allereie merka at behovet i Os er variert og at mange vil sleppa å reisa til by’n for å få tak i ein slange.
Aqua Circle, som no har tre tilsette, utvidar til fire.
– Vi var heldige då vi søkte etter folk og fekk tak i ein som tidlegare har jobba som seljar hos Pro-Flex i rundt ti år. Han hadde sagt seg opp før vi blei forhandlarar, men var klar for comeback i bransjen og startar hos oss over ferien.