Fleksible tankar om Lyseparken

I formannskapet tysdag blei ABO plan og arkitektur kåra som vinnar av konseptkonkurransen Os kommune hadde lyst ut for Lyseparken, det komande næringsarealet på oppunder 500 mål i Endelausemarka.

Les òg: Sånn skal Lyseparken formast

Arne Kristian Kolstad, partnar og fagansvarleg innan arealplanlegging i ABO, synest dette oppdraget var ekstra stas å få.

– Det er eit stort, fint og urørt terreng, eit jomfrueleg område som er spennande å få vera med å planlegga frå start, seier Kolstad.

Intenst oppdrag

– Vi hadde relativt kort tid på oss, rundt ein månad, men var 6-7 kollegaer saman om å utarbeida forslaget.

– Vegfolk, arkitektar og landskapsarkitektar var med.

I tillegg har ABO hatt med seg ein mann frå arkitektkontoret Migrant AS i Oslo.

– Dette var ein konseptkonkurranse og vi var bevisste på å halda oss til det, til å levera noko fleksibelt, noko som kan byggast ut over tid.

Handel i sør - kontor i nord

Lyseparken blir delt i to av ny veg frå komande E39 til Lysefjorden.

ABO har teikna inn store handelsbygg i sør med eksponering mot E39 og andre næringsbygg, til service og kontor, i nord.

– Områda i sør er litt kuperte, men lettare å opparbeida og ligg fint til i forhold til nye E39 mellom Os og Bergen.

– I nord er det andre kvalitetar, blant anna når det kjem til sol og utsikt.

Idrett og bustad?

I området i nord er det også teikna inn eit idrettsanlegg og nokre mindre område for bustadar.

– I dagens reguleringsplan er det ikkje opna for bustadar, men viss kommunen ønskjer aktivitet i Lyseparken etter stengetid er det med desse skissene opna for både idrett og gode buforhold, og andre typar bruk, som offentlege institusjonar.

– Dette er for å tilpassa området eit moderne arbeidsliv, med lange dagar og korte avbrekk med ei treningsøkt eller ein kort tur heimom.

Vindkraft til nabolaget?

ABO seier dei også har tatt omsyn til dei små vassdraga i området, ikkje berre det freda terrenget til den berømte augestikkaren, men andre bekkar.

– Det er også ein fin kolle midt i det nordre området, ein kolle vi ser for oss å lata stå som den er, som ei grøn lunge.

Mellom bygningane i næringsområdet er det på ABO sine skisser også nokre vindmøller.

– V har vore involvert i nokre større vindmølleprosjekt i fylket, men ser her for oss nokre mindre master - kanskje Lyseparken kan bli sjølvforsynt, seier Arne Kristian Kolstad.

Forslaga fell i smak

Os formannskap tok godt imot forslaga og ideane, frå bustadetablering til det å både gjera Lyseparken sjølvforsynt med straum og å, med vindmøllene, gje Lyseparken ein identitet.

Arbeidet med ABO vil gå utover hausten og vinteren.

Samtidig har Os kommune, og ABO, løyve til å ta element frå dei to andre arkitektkontora som deltok i konkurransen, med i prosessane vidare.