Endeleg eigen båt

Dei siste 50 åra har det så langt ein kjenner til berre blitt bygd åtte seksæringar av Oselvaren. Ingen av dei på Os. Torsdag var såleis ein merkesdag då Oselvarverkstadens eigen utgåve blei døypt og sjøsatt.

- Vi er utruleg glade at vi har fått overført noko av Harald Dalland sin kunnskap om byggjing av seksæringar til båtbyggjerane i høve dette prosjektet, sa dagleg leiar Åsmund Lien.

SJÅ VIDEO FRÅ SJØSETTINGA OG DEN FØRSTE ROTUREN HER.

I pose og sekk

Båten har dei bygd med støtte frå Sparebanken Vest sitt ållmennyttige fond "VestaVind".

- Vi har fått i pose og sekk.

- Ikkje berre fekk vi 300.000 kroner i støtte til å byggja båten og overføre kunnskapen, men vi fekk behalde båten òg, smila Lien.

Båten skal ligga ved Oselvarverkstaden og kunne nyttast av dei som ønskjer det.

- For Sparebanken Vest var det viktig å kunne bidra til å bringe gamle tradisjonar og handverk vidare, fortalte gudmor og banksjef Benedicte Toftesund.

Lang prosess

Åsmund Lien fortalt dei nok har brukt omlag dobbel så lang tid på seksæringen som dei brukar på ein færing.

- Vi har ikkje talt opp timane enno sidan vi har tatt det litt innimellom bestillingsbåtane, men vi har nok brukt omlag 600 timar på den.

- Berit Åsmundsen starta arbeidet med å byggje ein modell i den "kurrante" størrelsen 1 til 7, noko som var ein verdifull studie før vi gjekk i gang.

Harald Dalland har vore rådgjevar og konsulent i byggjeprosessen.

- Eg meiner det har vore viktig for verkstaden å få denne sjansen. Ein seksæring er noko heilt anna å byggje enn ein færing i og med at det er ein større og tyngre båt med andre eigenskapar, forklarte Dalland.

Ein båt med god plass

Kjell Magnus Økland som er i ferd med å sluttføra ei bok om Oselvaren tok dei frammøtte med på litt av seksæringen si historie.

- Den første registreringa av seksæringen eg har funne er i 1664. Då kosta den 3 dalar eller det same som ei og ei halv ku, fortalte Økland med eit smil.

Og nettopp buskap var noko av det båten var egna til å frakte.

- Sidan den er både lengre og breiare enn ein vanleg færing er den særs godt egna som arbeids- og skyssbåt, forklarte Økland.

Han fortalte den gjerne blei brukt til snøre-, line- og garnfiske på havet, not-, lakse- og sidefiske i fjordane og som fraktebåt av varer, ved, torv og fisk.

- Ei viktig rolle den hadde var å vise fram kor vellukka ein var.

- Difor blei den òg gjerne brukt til å ro til kyrkje eller til byen. Då var det viktig at den tok seg godt ut, avslutta Oselvarforfattaren.

Kva er forskjellen?

Færing = ein båt normalt med to par årar.
Seksæring = ein båt normalt med tre par årar. Også kalla treroing eller seksring.