Ein klassisk vårtur

Inspirert av 8. klassingane på OPPTUR har vi fått turlagsleiaren til å gje oss nokre av sine favorittar i bygda. Denne veka vil midtsiden.no koma med fem forskjellige turar bygda har å by på.

Turtips 1: Turen over Svinningen - Midtsæterfjellet.

Den klassiske vårturen til Os Turlag startar i botn av bakken mellom Klyva og Lonane på vegen ut mot Hatvik.

–Der finn du ein parkeringsplass på høgre side når du kjører utover, den er fin å starta frå.

Frå parkeringa går turen ut på Bjånes og vidare innover mot Moldaneset og Smievågen.

– Området ved Smievågen og Moldaneset har fått ei skikkelig ansiktsløfting. No er også stien imellom delvis grusa opp slik at et er lett framkommeleg, fortel Lohne.

Frå Smievågen går turen ut Moldadalen tilbake til parkeringa og bilen.

– Dette er den turen vi gjerne startar med på våren. Den er relativt enkel og grei å gå, fortel Lohne.

Ein vakker ettermiddagstur

Eit kortare alternativ er å velja rundløypa frå Moldadalen via Smievågen, ut på Moldaneset og inn igjen til Moldadalen gjennom skogen. Ein runde du lett gjer unna på om lag ein time.

Bergen og omland friluftsråd har fått opparbeidd ein parkering nede i dalen på venstre side av Bjånesvegen. Ta av ved Klyva, kjør forbi stallen på Moldegård og ned i dalen.

Ein tredje variant er å følgje strandvegen frå Os sentrum over Lyngheim, Solstrand og Moldegård til friluftsområdet.

Kva er din turfavoritt?

Send oss ein e-post med din favoritt-tur i Osbygda. Gje oss ein beskrivelse av turen og kvifor nettopp denne turen er din favoritt. Om du har bilde frå turen som vi kan få bruka set vi stor pris på det.

Turserien vil vi avslutta med lesarane sine favorittar.

Ditt turtips sender du til andris@midtsiden.no