Barcelona sin «hemmelege» naboby
Hans Parnefält sitt nye firma, Os Travel, er i full drift frå i dag. Samtidig lanserer han ei matreise til ein hamneby rett sør for Barcelona.
Bildeserie:
I desember 2016 fortalte Vitaltour-gründer Hans Parnefält at han ville gjera comeback i reiselivsbransjen, der han har 35 års erfaring.
I dag opna han kontoret sitt. Eller rettare sagt, han stiller ut under marknadsdagane, men er på plass i turistbygget på kaien frå måndag. På marknadsdagane står han saman med kona Eva Størksen, som dei siste åra har importert extra virgin olivenolje frå den katalanske byen Tarragona.
Nettopp denne bakgrunnen har danna grunnlaget for den første utanlandspakken til Os Travel.
– Vi har hatt våre første kundar på tur, frå Os A- og B-lag på treningsleir til Kypros i mars til ei gruppe frå Sverige, på 25 deltakarar, som har hatt ein opplevelsesrik tur på Vestlandet.
– Å henta turistar til Vestlandet er framleis det vi har hovudfokus på. Reisefølgjet frå Sverige fekk med seg fire konsertar på Festspillene, tur til Museet Lysøen og omvising og lunsj i Oseana, fortel Hans, som har brukt vinteren og våren på å gjera seg kjent med ei rekkje tilbud i Hardanger, Bergen og andre nabokommunar.
– Men vi vil ha fleire bein å stå på, og då er det naturleg å bruka både nettverket og kunnskapen vi frå før har i utlandet.
Matreiser til Tarragona
Os Travel lanserer på opningsdagen i dag ei matreise til Tarragona. Tarragona er ein spansk hamneby med rundt 150.000 innbyggarar, og ligg cirka ein times køyretur sør for Barcelona.
– Tarragona er omkrinsa av olivenlundar og vingardar. Vi har knytt tette band til éin av olivenprodusentane, Santiago Recasens. Vi har besøkt han fleire gongar og han har vore i Os to gongar.
Saman med Evas Mat har Os Travel no sett opp ein reisepakke som inkluderer både fly, opphald, utflukt til både olivengard og to vingardar, foredrag og fleire måltid med vin. Eva skal sjølv vera med som reiseleiar.
– Her får vi smaka prisvinnande vinar, eta fiken som er plukka frå eit over 300 år gamalt fikentre i hagen, og læra om råvarer og delikatesser frå den katalanske landsbygda.
– Vi har fire reiser med plass til 22 reisande på kvar tur, med direktefly frå Flesland. Det blir to weekendturar og to miniveke-turar, seier Hans, spent på responsen.
– Som ein kompakt versjon av Barcelona
I Tarragona ligg den store fornøyelsesparken Port Aventura, og bydelen Salou, der fleire norske idrettslag har treningsleirar og turneringar. Også Os Fotball og Os friidrett har vore på leir i Salou.
– Deltakarane på miniveke-reisene våre får ein heil dag utan program, og rekk fint å reisa inn til Barcelona. Men dei kan like gjerne bli igjen i Tarragona. Heile gamlebyen, som utgjer store delar av Tarragona, ser ut som dei mest spennande, gotiske kvartala i Barcelona.
• Les òg: Strandliv i Barcelona
– Byen har elles sin eigen Rambla, «Nova Rambla», som liknar på den verdskjente gata La Rambla i storbyen i nord. Tarragona har òg eit gamalt amfi frå tida romarane hadde byen som sin «hovudstad» på spanskekysten, og rikeleg med shoppingtilbod, både frå dei store, kjente varehusa, og når det kjem til marknadar.
– Tarragona er ikkje oversvømt av turistar, og det var faktisk vanskeleg å finna eit ledig hotell å gjera avtale med. Men her var vi heldige, og har fått booka oss inn i eit moderne, firestjerners hotell, kanskje det beste i byen, seier Parnefält på opningsdagen.